Jouluevankeliumi Yliperän kielellä
24.12.2008
Ja niihin aikhoin kävit siihen laihin, että keisari Aukustus anto käskyn, että koko mailma olit pantava veronalaiseksi. Tämä veronalaiseksi pano olit rohki ensimäinen ja se sattu Kyreniuksen ollessa Syyrian käskynhaltiana. Ja nethän menit kaikki kirjottaumhan veroluettelhon, itte kukin omhaan kaupunkhiinsa. Niinpä Joosehviki lähti Kalileasta, Natsareetin kaupunkista verole panoa varten Juutehaan, Taavitin kaupunkhiin Peetlehemhiin, sillä hään olit Taavitin sukua. Hään meni sinne yhessä kihlattunsa Marijan kanss, jok´oli viimisilhään oottamassa. Niin tapahtu, että kohtapa justhin ku het pääsit perile, Marijan synnyttämisen aika tulit ja hään synnytti pojan, esikoisensa. Hään kapaloi sikiönsä niin ku pruukathan ja pani seihmeen, ku heile ei löytyny siijaa majapaikasta. Sillä seu`ula olit paimenia kenturalla vahtaamassa vyölä laumaansa. Yhtäkkiä heän eessä seiso Herran enkeli ja Herran kirkhaus loisti he`än ympärilhän ja het pölästyit kauheasti, mutta enkeli sano heile: "Älkää pöljäkkö, sillä nähkää, mie ilmotan teile ison ilon, joka tullee koko kansale. Tänä päivänä teile oon syntyny Taavitin kaupunkissa Vapahtaja, jok`oon Ristus, Herra. Ja täm`oon teile merkkinä: tet löy`ättä sikiön, joka kapaloituna makkaa seimesä". Ja samala hetkelä olit enkelin kanss iso roikka taihvaalista sotaväkeä, jokka ylistit Jumalaa ja sano: "Kunnia oon Jumalalla korkeuksissa ja maassa rauha ihmisilä, joita hään rakastaa". Kun enkelit olit menheet paimenten tyköä taihvaaseen, het porisit keskenään ja päätit: "Menhäänpä juuri varsin Peetlehemhiin kattomhan, mitä siel`oon tapahtunnu ja minkä Herra meile ilmotti". Het lähit joutusasti ja löysit lapsivaimo Marijan ja Joosehvin ja sikiön, joka makasit seimesä. Tämän jälkhin het kerroit, mitä heile oli sikiöstä puhuttu. Ja kaikki, jokka satuit kuuhleen, ihmettelit, mitä paimenet puhuit. Mutta Marija kätki kaikki nämät sanat sishäänsä ja tutkiskelit niitä mieleshän. Paimenet palasit takasi kenturalhen kiittäin ja ylistäin Jumalaa siittä, mitä het olit kuuhleet ja nähneet. Kaikki olit justhin niin ku heile olit sanottu. (Kääntänyt Oiva Arvola)
|
Pääkirjoitus
